Narodźich so 28. oktobra 1957 we Worklecach.

Wot 1964 do 1972 chodźach w Pančicach-Kukowje do šule.

1972 dźěch na Serbsku rozšěrjenu wyšu šulu do Małeho Wjelkowa a Budyšina, hdźež złožich 1976 abituru.

Z dwanaće lětami stejach prěni raz na jewišću, hrajo na akordeonje a spěwajo.

Pola pianistki a jazzoweje komponistki Roswithy Neubert w Połčnicy mějach štyri lěta klawěrnu hudźbu.

Po połdralětnej słužbje we wójsku dźěłach najprjedy w Pančičanskim gmejnskim zwjazku na polu kultury a wot 1980 do 1988 w redakciji Noweje doby jako redaktor.

Štyri lěta bjerjech wječorne kubłanje spěwneje interpretacije pola docentki Theje Elster na Drježdźanskej wysokej hudźbnej šuli.

1990 złožich swoje pruwowanje jako powołanski spěwar-interpret.

Wot 1989 do 1992 hrajach w kapale „Horni kraj“ Adolfa Kiertschera a wot 1992 sym redaktor Serbskich Nowin.

Srjedź 80tych lět produkowach w Choćebuskim studiju swojej prěnjej spěwaj za Serbski rozhłós „Sylzy“ a „Swobodny być“ na tekst Gerata Libša a Helmuta Rychtarja.

Dźensa je jich něhdźe 400 spěwow, kotrež natočich z mnohimi našimi interpretami, spěwnymi skupinami, šolemi, z Wotrowskim cyrkwinskim chórom a dalšimi. Poboku su mi swěrni awtorojo kaž Beno Budar a Hrjehor Nawka, Madlena Nasticcyna, Werner Měškank, Bianka Wjencyna a dalši, kotrymž wuprajam swój wulki dźak.

1996 załožich swójske Weclichec hudźbne nakładnistwo.

Wot časa dźěćatstwa bydlu doma w Kukowje.